நிகண்டு

கட்டற்ற கலைக்களஞ்சியமான விக்கிப்பீடியாவில் இருந்து.

தாவிச் செல்லவும்: வழிசெலுத்தல், தேடல்

நிகண்டு என்பது சொற்களுக்கான பொருள்களைத் தருவதற்காக ஆக்கப்பட்ட நூல் வகையாகும். தமிழில் அகராதிகளுக்கு முன்னோடியாக இருந்தவை நிகண்டுகள். இந் நூல்கள் ஆரம்பத்தில் உரிச்சொற்பனுவல் என்ற தமிழ்ச் சொல்லால் அழைக்கப்பட்டன. எனினும் இச் சொல் நீளமாக இருந்ததனாலோ அல்லது இடைக் காலத்திலேற்பட்ட வடமொழிச் சொற்பயன்பாட்டு மோகம் காரணமாகவோ நிகண்டு என்ற வடமொழிப் பெயரே பிற்காலத்தில் நிலைபெற்று விட்டது. நிகண்டு என்னும் சொல் தொகை, தொகுப்பு, கூட்டம் என்னும் பொருள் தரும்.
நிகண்டு என்னும் நூல்வகைக்கு முன்னோடி போல் அமைந்தது தொல்காப்பியம். தொல்காப்பியர் அருஞ்சொற்களுக்கு மட்டும் பொருள்கூறிச் செல்கிறார். ஒரு சில எடுத்துக்காட்டுகள்:

• உரியியலில் அருஞ்சொற்களாகத் தோன்றியவற்றுக்குப் பொருள் தருகிறார். "வெளிப்படு சொல்லே கிளத்தல் வேண்டா, வெளிப்பட வாரா உரிச்சொல் மேன" ("பொருள் வெளிப்படையாகத் தெரிகின்ற சொற்களை விட்டுவிட்டு, பொருள் தெளிவற்ற அரிய சொற்களுக்கு மட்டும் பொருள் கூறுவோம்") என்று குறிப்பிடுகிறார்.
• மரபியலில் இளமைப் பெயர், ஆண்பாற் பெயர், பெண்பாற்பெயர் முதலியவற்றை நிகண்டுகள் போல் தொகுத்துக் கூறி, அவை தமிழ் மரபுப்படி வழங்கும் வழக்கையும் குறிப்பிடுகிறார்.

நிகண்டுகள் செய்யுள் வடிவில் அமைந்தவை. அவற்றில் ஒருபொருட் பல்பெயர், ஒருசொற் பல்பொருள், தொகைப்பெயர் என்னும் மூன்று பெரும் பிரிவுகள் உண்டு. அவை பெரும்பாலும் நூற்பாவினால் அமைந்தவை. வெண்பா, ஆசிரியப்பா, ஆசிரிய விருத்தம், கட்டளைக் கலித்துறை போன்ற பிற பாவகைகளினால் அமைந்த நிகண்டுகளும் உள்ளன.

 

காலம்	நூல்	ஆசிரியர்
கி.பி. 08ஆம் நூற்றாண்டு	திவாகரம்	திவாகரர்
கி.பி. 09ஆம் நூற்றாண்டு	பிங்கலம்(பிங்கலந்தை)	பிங்கலர்
கி.பி. 11ஆம் நூற்றாண்டு	உரிச்சொல் நிகண்டு	காங்கேயர்
கி.பி 15ஆம் நூற்றாண்டு	கயாதரம்	கயாதரர்
கி.பி 15ஆம் நூற்றாண்டு	பாரதி தீபம்	திருவேங்கடபாரதி
கி.பி 16ஆம் நூற்றாண்டு	சூடாமணி நிகண்டு	மண்டலபுருடர்
1594	அகராதி நிகண்டு(சூத்திரவகராதி)	இரேவணசித்தர்
கி.பி. 16ஆம் நூற்றாண்டு	கைலாச நிகண்டு சூளாமணி	கைலாசம்
கி.பி. 17ஆம் நூற்றாண்டு	ஆசிரிய நிகண்டு	ஆண்டிப்புலவர்
1700	பல்பொருட் சூடாமணி(வடமலை நிகண்டு)	ஈசுர பாரதியார்
1732	சதுரகராதி	வீரமாமுனிவர்
1769	அரும்பொருள் விளக்க நிகண்டு	அருமருந்தைய தேசிகர்
கி.பி. 18ஆம் நூற்றாண்டு	உசிதசூடாமணி	சிதம்பரக் கவிராயர்
கி.பி. 18ஆம் நூற்றாண்டு	பொதிகை நிகண்டு	சாமிநாத கவிராயர்
கி.பி. 19ஆம் நூற்றாண்டு	நாமதீப நிகண்டு	சிவசுப்பிரமணியக் கவிராயர்
கி.பி. 19ஆம் நூற்றாண்டு	பொருட்டொகை நிகண்டு	சுப்பிரமணிய பாரதி
1850	நாநார்த்த தீபிகை	முத்துசாமிப் பிள்ளை
1844	கந்தசுவாமியம் தொகைப் பெயர் விளக்கம் இலக்கத் திறவுகோல் அகராதி மோனைக் ககராதி யெதுகை	சுப்பிரமணிய தீட்சிதர் வேதகிரி முதலியார்
1874	சிந்தாமணி நிகண்டு	வைத்தியலிங்கம் பிள்ளை
1878	அபிதானத் தனிச்செய்யுள் நிகண்டு	கோபாலசாமி நாயக்கர்
கி.பி 19ஆம் நூற்றாண்டு	விரிவு நிகண்டு	அருணாசல நாவலர்
கி.பி. 20ஆம் நூற்றாண்டு	நவமணிக்காரிகை நிகண்டு	அரசஞ் சண்முகனார்
கி.பி. 20ஆம் நூற்றாண்டு	தமிழுரிச்சொற் பனுவல்	கவிராச பண்டிதர் இராம சுப்பிரமணிய நாவலர்

• திவாகர நிகண்டு (திவாகர முனிவர் இயற்றியது)
• பிங்கல நிகண்டு (பிங்கலம் இயற்றியது)
• சூடாமணி நிகண்டு (மண்டலபுருடர் இயற்றியது)
• உரிச்சொல் நிகண்டு (காங்கேயர் இயற்றியது)
• கயாதர நிகண்டு (கயாதர முனிவர் இயற்றியது)
• ஆசிரிய நிகண்டு (ஆண்டிப்புலவர் இயற்றியது)
• அகராதி நிகண்டு (சிதம்பர இரேவண சித்தர் இயற்றியது)
• அகம்பொருள் விளக்க நிகண்டு (அருமந்தைய தேசிகர் இயற்றியது)
• பொதிகை நிகண்டு (சாமிநாத கவிராயர் இயற்றியது)
• பொருள் தொகை நிகண்டு (சுப்பிரமணிய பாரதியார் இயற்றியது)
• நாமதீப நிகண்டு (சிவ சுப்பிரமணியக் கவிராயர் இயற்றியது)
• நானார்த்த தீபிகை (முத்துசாமிப் பிள்ளை இயற்றியது)
• சிந்தாமணி நிகண்டு (வல்வை ச.வைத்திலிங்கம்பிள்ளை இயற்றியது)
• நீரரர் நிகண்டு ( ஈழத்துப் பூராடனார் இயற்றியது)